रत्नागिरी जिल्ह्यातील गुहागर हे सागरी किनारपट्टीवरील अतिशय रमणीय, निसर्गसंपन्न गाव आहे. परशुरामांनी निर्माण केलेली, सागराच्या गर्भातून उत्पन्न झालेली, पावनभूमी म्हणजे गुहाघर, असे याचे वर्णन 'श्री व्याडेश्वर शिवहर'मध्ये कविता मेहेंदळे यांनी केले आहे.
या भूमीत शिवशंकराचे मंगलमयस्थान असलेल्या व्याडेश्वर मंदिराची माहिती लेखिकेने या पुस्तकात दिली आहे. श्री परशुराम क्षेत्र वलय, परशुराम मंदिर यांची ओळख करून मंदिर म्हणजे काय हे स्पष्ट केले आहे. गुहाघरमध्ये प्रवेश केल्यावर भरबाजारपेठेतील पूर्वाभिमुख श्री व्याडेश्वर मंदिराची माहिती दिली आहे.
मंदिराची लोककथा, व्याडेश्वराची दिनप्रणाली, मंदिरातील सण, उत्सव, धार्मिक विधी कोणते असतात, हे सांगितले आहे. त्याचबरोबर शिवसंकल्पना, शिवस्वरूप, शिवलिंग पूजा, गौरी-शंकर या संकल्पना विशद केल्या आहेत. जीनिव्हातील 'सर्न' नटराज मूर्ती, बारा ज्योतिर्लिंगे, शिवतीर्थक्षेत्रे, शिवमहतीच्या कथा, व्रत-उपासना, गुहाघरमधील मंदिराविषयीही यात लिहिले आहे. शंकराची स्तोत्रे, आरत्याही आहेत.